एक प्रहरीले चार सय १३ लाई सुरक्षा प्रदान

हतियार र लागुऔषधको विगविगी
१५ प्रहरी चौकी पुर्नस्थापना हुन बाँकी
३५७ प्रहरी कर्मचारीलाई कार्वाहि, २०५ जनालाई पुरस्कृत
५३ प्रहरी चौकीको पुनर्निर्माण
सुर्खेत, १२ भदौं ।
एक जना प्रहरी कर्मचारीले चार सय १३ जना व्यक्तिलाई सुरक्षा दिनुपर्ने बाध्यता रहेको छ । बढ्दो जनसंख्या संगै प्रहरी दरबन्दी थप नहुँदा ठुलो संख्यालाई प्रहरीले सुरक्षा दिनुपरेको मध्यपश्चिमाञ्चल क्षेत्रीय प्रहरी नायव महानिरिक्षक  पार्वती थापामगरले जानकारी दिईन् ।

मध्यपश्चिमका १५ जिल्लामा ८ हजार ६ सय ५९ जना प्रहरी कर्मचारीको दरबन्दी रहेको छ भने एक जना प्रहरीले पाँच वर्गकिलोमिटर क्षेत्रफलको इलाका हेर्नुपर्ने बाध्यता रहेको छ ।
मध्यपश्चिम क्षेत्र स्तरीय प्रहरी प्रमुखहरुको एकदिने कार्याशाला गोष्ठिको समापन कार्यक्रममा गरिएको पत्रकार सम्मेलनमा उनले उक्त जानकारी दिइएकी हुन् । गोष्ठि पछि जनशक्ति वृद्धि गर्नुपर्ने र समय समयमा सामाजिक तालिम प्रदान गरिनुपर्ने सुझाव माथिल्लो तहमा पठाईने भएको छ ।
उनले आवश्यक, प्रयाप्त जनशक्ति तथा स्रोत साधनको अभावमा शान्ति सुरक्षाका सवालमा सोचेजति प्रगति हुन नसकेको बताईन । कतिपय स्थानहरुका भवन अभावका कारण समेत उपलब्धि हाँसिल गर्नमा समस्या भएको उनको भनाई थियो ।
जनताको सेवा र सुरक्षाकालागी नेपाल प्रहरी हरदम खटीरहेको भन्दै जनताले पनि प्रहरीलाई सहयोग गर्नुपर्ने बताईन् । कर्णाली अञ्चलका विकट क्षेत्रमा भौगोलिक अबस्था तथा स्रोत साधन र जनशक्ति अभावका कारण शान्ति सुरक्षाका सवालमा समस्या भएको भनाई थियो । डोल्पा, हुम्ला सहितका हिमाली जिल्लामा मोटरबाटो भएपनि प्रहरीसंग सवारी साधन नहुँदा थप समस्या भएको छ । जनशक्ति अभावको समस्या रहेपनि ट्राफिक प्रहरीले राजस्व संकलन, लागुऔषध नियन्त्रण, अवैध हातहतियार नियन्त्रण, घरेलु मदिरा नियन्त्रण, भूमिगत संगठनलाई नियन्त्रण, अपराधीलाई पक्राउ र कार्वाहिमा उपलब्धि उल्लेख्य रहेको भनाई थियो ।
सोही अवसरमा आर्थिक बर्ष २०६७÷०६८ मा ४० हजार ३ सय ५२ सवारी साधनलाई कार्वाहि गरी ३३ लाख १६ हजार पाँच सय ३० रुपैयाँ राजश्व संकलन गरिएको थियो भने आर्थिक बर्ष २०६८÷०६९ मा ८० हजार ३२ सवारी साधनलाई कार्वाहि गरी १ करोड १ लाख ४७ हजार राजश्व संकलन गरिएको जनाईएको छ ।
प्रहरीले शान्ति सुरक्षा कायमका साथै स्थानीयबासीन्दालाई जानकारी गराउने उद्देश्यले सामुदायिक प्रहरी सेवा केन्द्रहरु बाँकेले २५ सय ३० वटा, सुर्खेतले १६ सय ४ वटा घरदैलो कार्यक्रम सम्पन्न गरेका छन् । दाङले २० वटा बैंक सुरक्षा र ट्राफिक नियम सचेतना, कालिकोटले २० वटा विद्यालयमा स्कुल सम्पर्क कार्यक्रम सञ्चालन गरेको जनाईएको छ ।
मध्यपश्चिम क्षेत्रमा प्रहरीले काठ नियन्त्रण, मानव बेचविखन, जवरजस्ती करणी, अपहरण, व्यक्ति हत्या, चोरी डाँका लुटपाटका घटनामा प्रहरीले सफलता प्राप्त गर्दै आएको प्रहरी नायव महानिरिक्षक थापामगरको दावि रहेको थियो ।
द्धन्द्धका क्रममा विस्तापित भएका मध्यपश्चिमका १५ प्रहरी चौकी पुर्नस्थापना हुन बाँकी रहेको जनाईएको छ । प्रयाप्त भौतिक संरचनाको अभावमा पुर्नस्थापना गर्न नसकिएको जनाईएको छ ।
द्धन्द्धकालमा क्षतिग्रस्त विगत तीन बर्षमा यस क्षेत्रका ५३ वटा प्रहरी चौकीका भवनहरु पुनर्निर्माण भएको र केही निर्माणाधिन अवस्थामा रहेको प्रहरी नायव महानिरिक्षक थापामगरले जानकारी दिईन । प्रहरी चौकीको आफ्नै जग्गा नहुँदा पुर्ननिर्माण कार्यमा अप्ठ्यारो भएको बताईएको छ ।
गत आर्थिक बर्षमा प्रहरी आचारसंहिता विपरित कार्यगर्ने ३ सय ५७ प्रहरी कर्मचारी कार्वाहिमा परेकोमा ७० जना सेवाबाट हटाईएको  थियो भने २ सय ५ जना प्रहरी कर्मचारीलाई पुरस्कृत गरिएको थियो ।